انا ماني مثل غيري

أنا ماني مثل غيري مع اللي يحبني بالذات ..
..أصير اقرب لها منها وأردّ الدّين لأصحابه
أدلّلها وأدلّعها وأعلّيها على النجمات..
..وأخلّي القلب لو أخطت يبوح بقاسي عتابه
أنا ماني مثل غيري..غيري يعشق العثرات..
..منى روحه وكل همّه يناظر غلطة أحبابه
أنا ماني مثل غيري..غيري يكثّر الخطوات..
..وكل بنت ٍ تهيّاله بلا تفكير..حيّابه
أنا ماني مثل غيري..غيري وافر الكذبات.
..وبنت الناس مسكينة..تقول: الناس كذابه
أنا ماني مثل غيري..غيري لو بكى شحّات..
..يحاول يكسر الخاطر..يقول: الروح منصابه
أنا ماني مثل غيري..غيري مسألة أوقات.
..ياخذ مايبي ثمٍّ يقول: شفيك نصّابه
أنا ماني مثل غيري..غيري بالهوى ما مات..
..يشوف انّ الهوى لعبة..ويمكن أحسن ألعابه
أنا ماني مثل غيري يقول: انّ البنات خبلات.
..يقول: البنت مهما تكون تراها بنت لعّابه
أنا ماني مثل غيري هويتك يالغلا بسكات.
..ومحدٍ يدري بحبي..ومحدٍ يعرف اسبابه
أنا عارف طموح البنت تبي منهو يلمّ شتات..
..تبي منهو يخلّيها..تكون لعينه اهدابه
وإنتي لو دريتي بي وفهمتي صادق الكلمات..
..يمين الله تحبّيني..وانتي مانتي مرتابه